االروماتويد ................... آآآآآآآآآآآآآآآآآآآآآآآه من الروماتويد

حبايبي عايزة افضفض معاكم شوية و يا رب تقدرو تفيدوني
انا من شهر 6 باعاني من روماتويد حاد , في الاول ما كنتش فاهمة سبب الآلام الرهيبة اللي عندي و افتكرتها شوية برد في عظامي و لا روماتيزم و اخذت مسكنات زي ما كنت باعمل كل ما رجلي توجعني شوية و خلاص
لكن ما فيش فايدة الألم بيزيد ببشاعة لدرجة اني بئيت ما قدرش اقوم من مكاني الا بمساعدة
فرحت لدكتور عظام و عملت شوية تحاليل طلعت نسبة روماتويد ما شاء الله في السما
فاداني علاج ارتحت عليه مؤقتا
و لما اتضحت الصورة انه روماتويد مش اي حاجة يعني رحت لاستاذة في التخصص ده و طلبت تحاليل تانية متخصصة و ما اقولكوش على النسب و جمالها ما شاء الله حاجة كدة ما تتقالش
المهم خدت معاها علاج 3 شهور و بعدين عدت التحاليل و رحت لها للمتابعة و لحظي الجميل التحاليل طلعت اسوأ من اول مرة
فغيرت لي العلاج بانواع تانية و ده لمدة شهرين كمان و المفروض اني حاروح لها بعد ما يخلصو

و بصراحة قريت كتير عن الروماتويد و مضاعفاته و كمان مضاعفات العلاج بالكورتيزون زي ما بآخد فخايفة اوي اوي و مرعوبة سواء من المرض و مضاعفاته او الكورتيزون و اضراره خصوصا ان ما لوش بديل كعلاج للمرض

علشان كدة بارجوكم اللي مرت بتجربة روماتويد مع حد قريب منها و كانت شايفاه عن قرب

تقول لي عن التجربة الأليمة دي و مدة العلاج تقريبا كانت اد ايه ؟
و نسبة التحسن و هل فيه ادوية بتستمر بعد العلاج ؟؟
و هل الحركة بتكون طبيعية ؟؟

و برضه سؤالي ده باوجهه لكل طبيبة بالمنتدى عندها معلومات تقدر تفيدنا بيها